ரெட்டச்சுழி - திரைவிமர்சனம்

பொதுவாக இயக்குனர் ஷங்கரின் தயாரிப்பில் வெளிவரும் படங்கள் நல்ல படங்களாகத்தான் இருக்கும். "அறை எண் 305ல் கடவுள்" திரைப்படத்திற்கு பின் இரண்டாவது முறையாக மிகப்பெரும் மொக்கையை சந்தித்தது இந்த ரெட்டச்சுழி படத்தில்தான்.
.
பாரதிராஜா (கம்யுனிஸ்ட்), பாலச்சந்தர் (காங்கிரஸ்காரர்) குடும்பத்திற்க்கிடையேயான 40 வருடப் பகை இவர்கள் வீட்டு குட்டிப்பிள்ளைகள் வரை தொடர்கிறது. இவர்கள் வீட்டில் பத்து, அவர்கள் வீட்டில் பத்து என்று குட்டிக்குட்டி உருப்படிகள். மிக முதிர்ச்சியான வார்த்தைகள் செய்கைகளோடு திரையில் உலவும் குட்டிப்பசங்க என்றாலே எனக்கு மிகப்பெரும் ஒவ்வாமை. குறைந்தபட்சம் "பசங்க" திரைப்படம் போலாவது இருந்திருக்கலாம். சத்தியமா இல்லை. அந்த குட்டிப்பசங்க நடவடிக்கைகள் இன்னொரு "மாத்தி யோசி". இதற்கிடையில் இந்த வீட்டு அஞ்சலிக்கும் அந்த வீட்டு ஒரு பையனுக்கும் (வேறு எவருமே கிடைக்கவில்லையா இந்த கதாப்பாத்திரத்துக்கு) காதல். இடையில் கருணாஸ். ஸப்பாஆஆஆஆஆ முடியல.

.
இயக்குனர் இமயம் பாரதிராஜா (கல்ல கூட நடிக்க வைக்கும் அற்புத இயக்குனர்), இயக்குனர் சிகரம் பாலச்சந்தர் (எத்தனையெத்தனை அறிமுகங்கள் இன்று ஜொலிக்கும் நட்சத்திரங்கள்) இரண்டு பேரும் நடித்த படம் என்பதனால் எனக்கு மிகுந்த எதிர்பார்ப்பு இருந்தது இந்த படத்தின் மேல். மேலும் "ஆயுத எழுத்து" படத்தில் பாரதிராஜாவின் நடிப்பு என்னை மிகவும் கவர்ந்திருந்தது. இயக்குனர் தாமிரா அப்படியே போட்டு உடைத்திருக்கிறார் இவர்களை. இவர்கள் இருவரும் இந்த படத்திற்கு தேவையா என்பதே என் முதல் கேள்வி. அதே நேரத்தில் தன் குரு பாலச்சந்தரையும், இமயம் பாரதிராஜாவையும் தன் படத்தில் நடிக்க வைத்திடவேண்டும் என்று மிகப்பெரும் ஆசையை நிறைவேற்றி கொண்டவரை நான் குற்றம் சொல்லவும் முடியாது. நல்ல கதை, திரைக்கதையோடு இவர்களை அணுகியிருக்கலாம் என்பதே ஆசை.
.
அந்த அவ்வளவு குட்டி பசங்க தேவையா என்பது மற்றொரு கேள்வி. இந்த பக்கம் ஒரு நாலு அந்த பக்கம் நாலு போதுமே. அந்த இருபது பிள்ளைகளில் ஓரிருவர் நல்லா பண்ணியிருந்தாங்க. குறிப்பாக அந்த பையன், பாரதிராஜாவிடம் நட்பாக விரும்பி, "தோழரே, நானும் நம்ம இயக்கத்தை பத்தி நிறைய படிச்சிருக்கேன்" என்று ஆரம்பிக்கும் வசனம் அதகளம். படத்தில் சில சில இடங்களில் வசனங்கள் நன்றாக இருந்தது. சில அரசியல் வசனங்களும் நல்லா இருந்தது. படத்தின் மொத்த குழுவில் ஒளிப்பதிவாளர் செழியன் நிறைவாக செய்திருக்கிறார். கார்த்திக் ராஜா, கிடைக்கின்ற வாய்ப்புகளை கூட சொதப்புவது வருத்தமாக இருக்கிறது. ஒரு பாடல் கூட ரசிக்கும்படியோ முனுமுனுக்கும்படியோ இல்லை.
.
கிட்டத்தட்ட மொத்த படமும் ரொம்ப செயற்கையா ஒரு நாடகம் மாதிரி இருந்தது. இயக்குனர் தாமிரா, இமயம், சிகரம், ஷங்கர் எல்லாருக்கும் நன்றாக கதைசொல்லியிருப்பார் போலும். ஷங்கரின் அடுத்த தயாரிப்பான அனந்தபுரத்து வீடாவது நன்றாக இருக்கும் என்று எதிர்பார்ப்போம்.
.
ரெட்டச்சுழி - கோடை விடுமுறையில், குடும்பத்தோடு குழந்தைகளோடு, ஆபாசங்கள் இல்லாத படம் பார்க்க விரும்பினால் செல்லுங்கள். அல்லது இமயமும் சிகரமும் அஞ்சலியும் திரையில் எப்படி இருக்கிறார்கள் என்று பார்க்க விரும்பினால் செல்லுங்கள். மற்றபடி இந்த படத்தை பார்க்காமலிருப்பது சாலச்சிறந்தது என்றே சொல்வேன்.
.

மறக்காம உங்க கருத்துக்களை எழுதுங்க. தமிழ்மணம், தமிழிஷ் ஓட்டு போடுங்க..
24.04.2010