விண்ணைத்தாண்டி வருவாயா - திரைவிமர்சனம்

இதமான குளிர் காலையில் கடற்கரையில் அமர்ந்து உதிக்கப்போகும் சூரியனுக்காக வானம் பார்ப்பது போன்றதொரு உணர்வை தரக்கூடியது நல்ல இசையுடன் கூடிய அழகான காதல் செறிந்த திரைப்படங்கள். இப்படமும் கிட்டத்தட்ட அதே போன்றதொரு உணர்வை தந்தது. காதல் ஒரு மாயம்; "நான் ஏன் ஜெஸ்ஸியை லவ் பண்ணினேன்" என்று இத்திரைப்படம் முழுதும் வரும் கேள்வி காதலின் மாயத்தை பருகத்தருகிறது.
.
கார்த்திக் - ஜெஸ்ஸி; திரைப்படத்தின் கதை சென்னை போன்றதொரு நகரத்தின் வழக்கமான காதல் கதைதான். காட்சிகள் கூட ரொம்ப புதுமையாக இருக்காது. (ஒருவேளை உலகத்தில் இருக்கும் அனைவரும் காதலுக்கு ஒரே ஒரு சூத்திரம் மட்டுமே பயன்படுத்துகிறோம் போல). படம் முழுதும் விரவி பரவும் இசையும் அழகான ஒளிப்பதிவும் வசனங்களும் கார்த்திக் - ஜெஸ்ஸியின் காதலை படம் முழுதும் நிரப்புகிறது.

.
வீட்டு ஓனரின் பெண் ஜெஸ்ஸி (த்ரிஷா) (மலையாளி; கிறிஸ்டியன்; Program Analyst (Polaris)) - அவ்வீட்டில் குடியிருக்கும் தமிழ் குடும்பத்தின் பையன் கார்த்திக் (சிம்பு; சாரி சாரி; யங் சூப்பர் ஸ்டார் சிம்பு) (தமிழன்; இந்து; Mech Engineering Graduate; Assistant Director to K.S.Ravikumar; ஜெஸ்ஸியை விட ஒரு வயசு சின்னப்பையன்). முதல் பார்வையிலே கார்த்திக்கு பற்றி கொள்கிறது காதல். பின்பு ஜெஸ்ஸியை துரத்தி துரத்தி காதலித்து ஜெஸ்ஸியின் காதலை அடைந்தாலும், சமூக அடையாளங்களுக்கு பயந்து காதலை நிராகரிக்கும் ஜெஸ்ஸி. இவர்கள் காதல் என்னவானது. ஒன்று சேர்ந்தார்களா என்பது மீதிக்கதை.
.
கௌதமின் மின்னலே, காக்க காக்க எனக்கு பிடித்த படங்கள். ஆனால் வேட்டையாடு விளையாடு, பச்சைக்கிளி முத்துசரம், வாரணம் ஆயிரம் என்னை கடுமையாய் வெறுப்பேற்றியது. என்பதனாலேயே இப்படத்திற்கு செல்வது பற்றி யோசித்துக்கொண்டிருந்தேன். ஆனால் A.R.ரஹ்மானின் இசை; த்ரிஷா; சிம்புவுக்காக இப்படத்துக்கு செல்லலாம் என்று சென்று பார்த்தேன். எனக்கு திரைப்படத்தினுள் ஒரு திரைப்படம் போன்ற concept திரைப்படங்கள் மிகவும் பிடிப்பதுண்டு. இப்படத்தில் கௌதம் அதை கொஞ்சம் அணுகியிருக்கிறார். இதே திரைப்படத்தை தெலுங்கில் நாக சைத்தன்யா, சமந்தா வைத்து படமாக்கி இருக்கும் கௌதம், அவர்களை இங்கு தமிழில் பயன்படுத்தி இருப்பது புத்திசாலித்தனம். அதே போல காட்சிகள் மற்றும் காட்சிகள் சார்ந்த அழகுணர்ச்சியில் மீண்டும் கௌதம் நிரூபித்திருக்கிறார். சிம்பு, ஒகேவாக செய்திருந்தார். திரிஷா அழகு பதுமை. (இருந்தாலும் சர்வம் படத்தில் இன்னும் அழகாக இருந்தார்). இருவரும் OK.
.
நல்ல வேளையாக இப்படத்திற்கு ஹாரிஸ் இசை அமைக்கவில்லை. அமைத்திருந்தால் இப்படத்தின் பின்னணி இசை பற்றி இப்போது நினைக்கவே பயமாய் இருக்கிறது. ஆனால் ரஹ்மானோ இப்படத்திற்கு உயிர் கொடுத்திருக்கிறார். ஒவ்வொரு காட்சியிலும் ரஹ்மான். பாடல்கள் அத்தனையும் அருமை. காட்சிபடுத்துதலிலும் ஓரளவு நன்றாக செய்திருக்கிறார் கௌதம். ஆனால் இன்னும் சிறப்பாக செய்திருக்கலாம் என்பது என் எண்ணம். மேலும் மனோஜின் ஒளிப்பதிவு சிறப்பாக இருந்தது. ஆண்டனியின் படத்தொகுப்பு வழக்கம் போல.
.
வேறேதும் படத்தில் நுண்ணரசியல்கள் இருந்தால் அதை சுகுணாதிவாகர் எழுதும் போது படித்து தெரிந்துகொள்ளலாம். மொத்தத்தில் விண்ணைத்தாண்டி வருவாயா ரசிக்கும் படி இருந்தது. கலக்கீட்டீங்க ரஹ்மான். ரொம்ப நாள் ஆச்சு. இப்படி உங்கள் இசை முழுமையாய் உணர்வாய் பரவிக்கிடந்த ஒரு தமிழ்படம் பார்த்து. நன்றி கௌதம்.
.
விண்ணைத்தாண்டி வருவாயா - காதலும் இசையும் மட்டுமே வாழ்வை அழகாக்குகிறது.
.
மேலும் மேலும் உருகி உருகி உனை எண்ணி ஏங்கும் இதயத்தை என்ன செய்வேன்
.

மறக்காம உங்க கருத்துக்களை எழுதுங்க. தமிழ்மணம், தமிழிஷ் ஓட்டு போடுங்க..
28.02.2010