தமிழ்ப்படம் - திரைவிமர்சனம்

படத்தை பெரிதாக்கி பார்க்கவும்.
.
இப்படத்தின் ட்ரைலரை பார்க்கும்போது என்னமாதிரி இத்திரைப்படத்தை எதிர்பார்த்தேனோ, அவ்வாறே மிகச்சரியாக செய்திருக்கிறார்கள். சிரித்து சிரித்து வயிறு புண்ணாகுகிறது. மிக கச்சிதமான Spoof. நேற்றே இத்திரைப்படத்தை காண விழைந்தேன், ஆனால் தியேட்டரில் அப்படியொரு கூட்டம், நேற்று டிக்கெட்டே கிடைக்கவில்லை. ஹவுஸ்புல். என்பதனால் இன்று காலைதான் காணமுடிந்தது.
.

சினிமாப்பட்டி கிராமத்தில் பிறக்கும் ஆண் குழந்தைகள், சென்னைக்கு வந்து, மாஸ் ஹீரோவாகி அலைப்பறை செய்வதால், கிராமத்தில் இனி பிறக்கும் ஆண் குழந்தைகளை கள்ளிப்பால் (P.R.S கள்ளிப்பால், சுத்தமானது, சுகாதாரமானது) ஊற்றி கொல்லும் பழக்கத்தை மேற்கொள்ளும் நேரத்தில் தளபதி, தலைவன், வைஸ் கேப்டன், அகில உலக சூப்பர் ஸ்டார் "சிவா" பிறக்கிறான். பத்தே வயதில் பெரியவனாகி அநியாயங்களை தட்டிகேட்கிறான். அவன் செய்யும் அட்டகாச அழிச்சாட்டிய அலைப்பறை தான் இத்திரைப்படம்.
.
ஒப்பனிங் துதி பாடலில், திரையில் ஒரு வரி வருகிறது. "இப்பாடலை பாடியது உங்கள் சிவா". பின்பு அந்த வரி இவ்வாறு முழுமையடைகிறது "இப்பாடலை பாடியது உங்கள் சிவா, என்று போடுமாறு அவர் கேட்டுக்கொண்டார்". இனி கற்பனை செய்துகொள்ளுங்கள் எவ்வளவு அட்டகாசங்கள் படத்தில் இருக்குமென்று. நாயகன், தூள், ரன், தளபதி, சிட்டிசன், போக்கிரி, சிவாஜி, கந்தசாமி, சிம்பு, ராமராஜன், என படங்கள், நடிகர்கள், திரைப்படங்கள் என ஒன்றையும் விடவில்லை. பிரித்து மேய்ந்திருக்கிறார்கள்.
.
மிர்ச்சி சிவா, மிக சிறப்பாக செய்திருக்கிறார். வசன உச்சரிப்பும், உடல் மொழியும் இந்த படத்திற்கு சரியாக பொருந்துகிறது. மற்றும் அத்தனை நடிகர்களும் நன்று. தங்கள் பெரிய குடும்பத்தின், இரண்டு குடும்பங்கள் எடுக்கும் திரைப்படத்தை இன்னொரு குடும்பத்தின் திரைப்படம் கேலி செய்கிறது. தயாநிதி அழகிரிக்கு பாராட்டுக்கள். இயக்குனர் அமுதனுக்கும், ஒளிப்பதிவு இயக்குனர் நிரவ்ஷாவுக்கும் பாராட்டுக்கள்.
.
படத்தின் ஒரே குறை, ரொம்பவே சிரிக்கவைப்பது. சிரித்து சிரித்து சிரிப்பே அலுக்கிறது. கொஞ்சம் ஓவர் டோஸ் ஆயிடுச்சோ என்று தோன்றியது. இந்த படம் நிச்சயம் சென்னையில் வெற்றி பெரும் என்பதில் சந்தேகமில்லை. இத்திரைப்படத்தின் வெற்றி இன்னும் சில Spoof வர வழிவகுக்கும் என்று தோன்றுகிறது. தமிழ்சினிமா தன் பழைய புளித்து போன பாதையை மாற்றுமா??!!!
.
கோவா, தமிழ்ப்படம் இரண்டு படங்களும் சிரித்து கொண்டாட உத்திரவாதம். இந்த வருடத்தின் ஆரம்பமே நன்றாக இருப்பதாக தோன்றுகிறது. (ஆயிரத்தில் ஒருவன், நாணயம், கோவா, தமிழ்ப்படம் என்று..)
.
தமிழ்ப்படம் - தியேட்டரில் பாருங்கள். சிரித்து மகிழுங்கள். கூட்டத்தோடு சிரிக்கும் போது, சிரிப்பின் எல்லைகள் இன்னும் விரிவடையும்.

மறக்காம உங்க கருத்துக்களை எழுதுங்க. தமிழ்மணம், தமிழிஷ் ஓட்டு போடுங்க..
31.01.2010